Pas vitesh ngecjeje dhe zvarritjeje, interkoneksioni 400 kV mes Maqedonisë së Veriut dhe Shqipërisë tashmë po hyn në fazën e realizimit. Bëhet fjalë për një projekt me peshë strategjike për vendin dhe rajonin, që forcon lidhjen mes dy shteteve dhe i jep shtysë të re bashkëpunimit energjetik, njoftuan nga VLEN.
“Ky projekt ka peshë të shumëfishtë. Ai forcon sigurinë energjetike, rrit stabilitetin e sistemit të transmetimit dhe hap mundësi të reja për integrim më të thellë në tregun rajonal dhe evropian të energjisë. Në të njëjtën kohë, me këtë interkoneksion po mbyllet edhe hallka e fundit energjetike e Korridorit 8 Pan-Evropian, duke i dhënë vendit lidhje më të fortë infrastrukturore dhe energjetike me Shqipërinë. Nuk është rastësi që drejtori i përgjithshëm i SHA MEPSO, Burim Latifi, e cilësoi këtë interkoneksion si urë besimi dhe bashkëpunimi mes dy vendeve, si një lidhje energjetike të natyrshme, të domosdoshme dhe largpamëse”, thanë nga VLEN.
Nga VLEN theksuan se për vite me radhë kanë dëgjuar shumë për projekte strategjike, por kanë parë fare pak vepra. Ndërsa sipas tyre sot dallimi shihet qartë për këdo që do ta shohë.
“Dikush i përdorte këto tema për propagandë, ndërsa sot ato po konkretizohen. Për VLEN-in, kjo është rruga e duhur, më pak fjalë, më pak zhurmë dhe vetëm punë”, shtuan nga VLEN./Alsat.mk.
