Ministri i Mbrojtjes Niko Peleshi e cilësoi një zjarr pothuajse serioz flakët që pushtuan për katër ditë me radhë ishullin e Sazanit. Gjatë debatit në Komision me deputetin e PD Ferdinant Xhaferaj, Peleshi u shpreh se çështja e zjarrit në Sazan është bërë sikur të ishte bërë nami.
Ai drejtoi gishtin nga bashkitë duke thënë se janë ato që kanë nën varësi zjarrfikëset dhe ato duhet të bëjnë reagimin e parë për të parandaluar përhapjen e flakëve.
Peleshi shtoi se, Shqipëria nuk ka mundësi që të blerë një avion 50 milionë euro, që shërben për shuarjen e flakëve. Ai tha se ushtarëve gjatë vitit të kaluar iu desh që të ecnin për gati 5 orë në këmbë për të shuar zjarrin në Llogara apo dhe në Sazan.
Niko Peleshi është duke iu përgjigjur pyetjeve në seancën dëgjimore që është duke u zhvilluar në Komisionin për Sigurinë Kombëtare, e kërkuar nga deputetët e Grupit Parlamentar të Partisë Demokratike.
Diskutimet mes palëve janë bërë me tone të ashpra në kuadër të ndryshimeve të fundit të propozuara në projektligjin “Për disa shtesa dhe ndryshime në ligjin nr. 13/2015, “Për Policinë Ushtarake në Forcat e Armatosura të Republikës së Shqipërisë”” si dhe me problematikën e krijuar si rezultat i zjarreve në ishullin e Sazanit.
Referuar rasteve të zjarreve, Peleshi iu tha deputeteve të opozitës se “nëse pretendoni që mos të ketë asnjë zjarr në Shqipëri nuk ka asgjë të keqe”. Por kjo fjali e ministrit të Mbrojtjes u mor si ironike nga deputeti i PD, Ferdinand Xhaferaj, i cili i kërkoi Peleshit të jetë serioz.
“Ne nuk pretendojmë të kemi zjarre ne pretendojmë të kemi një helikopter këtu”, u shpreh me tej Xhaferaj.
Por, Peleshi u përgjigj duke thënë se nuk po bën aspak ironi, madje pranoi se po të ishte në opozitë do të gjente rastin ta përmendte situatën e zjarreve sa herë të kishte mundësi për të goditur palën kundërshtare.
FJALA E MINISTRIT PELESHI:
“E dëgjoj shqetësimin e ngritur nga Xhaferaj dhe deputetet e tjerë. Dua t’ju siguroj se te pyetja e parë që lidhet me ligjin për policinë ushtarake, asnjë prej aludimeve nuk qëndron. Nuk është qëllimi që duke modifikuar një togë-fjalësh në të ulim nivelin e mbrojtjes së forcave të armatosura. Keqkuptimi vjen nga zëvendësimi I fjalës mbrojtje me ruajtje. Nëse keni menduar se me këtë po i heqim të drejtën e ruajtjes forcave të armatosura për pronat ushtarake, ju them që as nuk është ruajtur nga Policia Ushtarake dhe as do të ruhet. Sepse ruhet nga repartet përkatëse dhe ka detyra të mirëcaktuara sesi komandanti i një reparti që ka në juridiksion ruajtjen e ka të detajuar planin. Kur flasim për mbrojtjen e pronës, t’u bëj një analogji me ligjin për policinë e shtetit. Policia e Shtetit mbron jetën, ligjin dhe pronën private. Kur themi që policia ushtarake mbron pronën, nuk e ruan me kallash, por njoftohet nga njësi përkatëse e forcave të armatosura dhe shkon bën procedurën. Polica ushtarake nuk është policia e shtetit që të bëjë veprime shtrënguese ndaj qytetarit kur ka cenim të pronës, si vepër penale. Pse bëhet ky modifikim kur s’është e nevojshme. Për të mos ngatërruar ekuivokun. Edhe mund të mos ndryshonte fare, ose nëse ju keni një propozim tjetër në vend të këtij togfjalëshi që tregon se nuk ulet vigjilenca ose ruajtja ju silleni dhe unë do e mbështes. Ruajtjen nuk e bën policia ushtarake, nuk e ka bërë dhe nuk e bën dot. Ne kemi 1500 prova dhe policia ushtarake ka 500 efektivë, kështu që është edhe e pamundur që ti ruajmë me pushkë të gjitha pronat ushtarake. Nuk ka raste ku ne ngarkojmë policinë ushtarake të ruajë një pronë të caktuar me roje fizike. Ju ndryshojeni togfjalëshin nëse doni. Por qëllimi është t’i japim Cezarit çfarë i takon Cezarit, nuk ka konsipracion këtu.”/GSH
