Etiopia ka mbjellë më shumë se 200 milionë pemë në një ditë, kanë thënë zyrtarët shtetërorë, që besojnë se ky është rekord i ri botëror.
Kryeministri Abiy Ahmed po udhëheq projektin, që synon të kundërshtojë efektet e shpyllëzimit dhe ndryshimet klimatike në vendin që njihet për thatësira.
Disa zyra publike janë mbyllur për të lejuar nëpunësit civilë të marrin pjesë në mbjelljen e pemëve, raporton BBC.
Organizata e Kombeve të Bashkuara ka thënë se shtrirja e maleve në Etiopi ka rënë nga 35 për qind e territorit në fillim të shekullit 20 në pak më shumë se katër për qind në të 2000-at.
Zyrtarët kishin numëruar mbjelljen e pemëve, transmeton Koha.net. Ministri i Inovacionit dhe Teknologjisë në Etiopi, Getahun Mekuria, ka shkruar në rrjete sociale se në vend ishin mbjellë më shumë se 220 milionë pemë.
Synimi i shtetit është të mbjellë në total katër miliardë pemë.
Video promovuese janë shpërndarë në media shtetërore për të nxitur publikun të mbjellë e të kujdeset për pemët.
Rekordi botëror aktual për mbjelljen e pemëve në një ditë mbahet nga India, që përdori 800 mijë vullnetarë për të mbjellë më shumë se 50 milionë pemë më 2016.
