Deri në orët e vona të mbrëmjes së djeshme është punuar me intensitet për të shkarkuar anijen me qymyr, ndërsa përfaqësues të agjencive të ndryshme ligjzbatuese shqiptare me në krye task-forcën permanente janë prezentë në këtë proces. Burime nga grupi i hetimit thanë për gazetën “Panorama” se është shkarkuar afro 50 për qind e ngarkesës së qymyrit (6500 tonë ngarkesa e plotë në anije), por nuk është gjetur sasi tjetër droge.
NGARKESA E KOKAINËS, “JETIME”
Ndërkohë që është zbuluar sasia e konsiderueshëm e ngarkesës me kokainë pas sinjalizimit të ndërkombëtarëve, ajo që nuk dihet deri më tani është se kush e porositi drogën dhe ku do të përfundonte ajo. Ndërsa në shumicën e rasteve janë arrestuar vetëm transportuesit, në rastin e fundit, Policia deri më tani nuk ka prangosur asnjë person.
“Po mbikëqyrim të gjithë procesin e shkarkimit. Deri tani kemi shkuar në gjysmën e punës. Por nuk është se kemi gjetur sasi tjetër lënde narkotike përveç dy çantave me 53 pako që zbuluam ditën e parë të operacionit.
Po monitorojmë procesin dhe të shohim nëse ka apo jo sasi tjetër droge në ngarkesën e qymyrit, i cili ndodhet rifuxho në hambarin e anijes ‘Unistream’, e cila ka kapiten një rus dhe transportonte 6500 tonë qymyr. Deri tani kemi marrë në pyetje përfaqësues të kompanisë porositëse dhe ekuipazhin dhe të dy palët e kanë mohuar të kenë pasur dijeni për praninë e lëndës narkotike në ngarkesën e qymyrit që fillimisht është nisur nga Kanadaja, por porti i fundit para atij të Durrësit është porti i Barranquilla në Kolumbi”, thanë burime nga grupi i hetimit.
PSE U ZGJODH QYMYRI?
Të njëjtat burime konfirmojnë faktin se tashmë me sekuestrimin e mbi 1 toni kokainë të ardhur me kontejnerë nëpërmjet Amerikës Latine, ka bërë që trafikantët të gjejnë alternativa të tjera, deri diku më të sigurta, për të kryer transportimin e lëndës narkotike. Fakti që qymyri nuk kalon në skaner, ka bërë që trafikantët ta shikojnë si një mundësi të mirë dhe me më pak risk për të kryer aktivitetin e tyre të transportimit të drogës.
“Pak kohë më parë është urdhëruar që pjesa më e madhe e kontejnerëve të kalojnë në skaner dhe ata që vijnë nga Amerika Latine duhet të kalojnë të gjithë. Skaneri dihet që zbulon. Në këto kushte, trafikantët e kanë braktisur tashmë këtë mënyrë të transportit të drogës dhe, me sa duket, nisën të përdorin ngarkesat rifuxho të qymyrit të gurit, i cili nuk kalon në skaner.
Por ata harrojnë që atje ku niset droga, ata janë të mbikëqyrur nga agjencitë ndërkombëtare të zbatimit të ligjit, siç është edhe rasti konkret. Ne u informuam nga partnerët dhe ja ku është rezultati”, theksuan burime nga grupi hetimor.
Mësohet se anija është e “Unistream”, me flamur të Antigua Barbuda, nga Ishujt Karaibe, ishte nisur nga porti i Monrealit në Kanada me datë 2 prill, ndërsa më pas, në datë 5 maj, ka mbërritur në portin e Baie Comeau (Kanada), në datën 21 prill anija është ankoruar në portin e Port-au prince Haiti (Haiti), ndërsa me datë 26 prill ka bërë stacionin e fundit para se të mbërrinte në portin e Durrësit në portin Barranquilla në Kolumbi.
Në datën 16 maj, anija “Unistream”, me kapiten një shtetas rus, mbërriti në portin detar të Durrësit. Vetëm në dy vitet e fundit në portin e Durrësit janë zbuluar mbi 1 ton lëndë narkotike e llojit kokainë e ardhur nga Ekuadori dhe Kolumbia apo nga vende të tjera prodhuese të Amerikës Latine, shkruan Leonidha Musaj.
Një postbllok i Policisë Rrugore ka mbirë prej pesë ditësh në hyrjen e Terminalit Lindor në Portin e Durrësit, ku historikisht janë shkarkuar mineralet. Dy punonjësit e policisë rrugore ngrejnë tabelën e ndalimit për këdo që nuk nget një automjet me mbishkrimin policia. Rruga për në fund të kalatës është bllokuar dhe kudo ka grupe policësh e mjete me fenelina.
Përforcimi me mjete policie dhe postoblloku janë në kalatë që prej të hënës, kur task-forca e Policisë së Durrësit kundër trafikut të narkotikëve zbuloi një sasi lënde të dyshuar kokainë në ngarkesën me qymyr të anijes së mallrave me emrin “Unistream”.
Anija e mallrave 132 metra e gjatë ishte nisur nga Barranquilla, një port në Kolumbi dhe mbërriti në Durrës pas lundrimit gati 20 ditor. Ajo u vendos në Terminalin Lindor që shërben për ngarkim-shkarkimin e mineraleve mëngjesin e 16 majit dhe pas ndërhyrjes së policisë mes qymyrit u gjet, siç thonë zyrtarë të policisë që duan të mbeten anonimë, një sasi prej gati 60 kilogramësh lëndë narkotike e dyshuar si kokainë. Një njoftim zyrtar për këtë kapje nuk ka, pavarësisht kohës që ka kaluar.
Kjo nuk e ka kënaqur policinë dhe as SPAK që drejton hetimet. Prej pesë ditësh punonjës të policisë, qen antidrogë dhe polumbarë po kontrollojnë mbi e nën anije për të zbuluar nëse veç drogës së kapur kishte në të edhe sasi tjetër.
“Mund të them që kontrollet vazhdojnë”, i tha BIRN Vladimir Mara, prokuror i SPAK që ka nën hetim dosjen.
BIRN mësoi nga intervista me punonjës të policisë dhe punonjës të një prej agjencieve të huaja ligjzbatuese të përfshira në aksion, se autoritetet që e kishin ndjekur anijen kishin dyshime për një sasi më të madhe droge.
“Po presim të vijnë agjentët e DEA-s Amerikane [Agjencia Amerikane për Luftën Kundër Drogës] sepse rasti ka qenë i sinjalizuar dhe autoritetet shqiptare vetëm kanë ndërhyrë”, tha për BIRN në kushtet e anonimatit një zyrtar i Policisë Kufitare.
“Ata kanë këmbëngulur që mos të mjaftohemi me 60 kg që kapëm ditën e parë, por ta kontrollojmë në detaje ngarkesën dhe anijen”, shtoi ai.
Ndërkohë drejtues të policisë vendore pohuan për BIRN se operacioni do të zgjasë të paktën deri në fillimin e javës që vjen, me përfundimin e kontrollit të plotë të anijes, përfshirë dhe strukturës së saj. Punonjës të policisë thonë se kanë dyshime se droga mund të jetë shkarkuar para se anija të mbërrinte në port edhe pse siç u mësua ajo është ndjekur gjatë gjithë rrugës së saj.
IZOLOHET EKUIPAZHI, ARRESTIMI I TYRE I PAMUNDUR
Që prej të hënës ekuipazhi i anijes është izoluar. Por punonjësit e portit thonë se ata nuk mund të arrestohen.
“Ekuipazhi nuk mban përgjegjësi për ngarkesën”, tha një prej punëtorëve më të vjetër në port. Edhe prokurori Mara i tha BIRN se ata nuk ishin të arrestuar, por ishin pyetur vetëm si dëshmitarë.
Po ashtu në zonë prania e policisë është e dukshme. Makina të patrullave vijnë dhe ikin nga kalata thuajse çdo 15 minuta, ndërsa në anije dhe pranë saj ka gjithmonë një grup me punonjës policie civilë.
Një punonjës i portit rreth të 60-tave tha se qymyri, malli i parë që anija sillte kishte përfunduar së shkarkuari vetëm të premten. “Sot përfundoi shkarkimi i plotë i qymyrit”, tregoi burri, ndërsa duket se policia ka kontrolluar çdo copë minerali për të gjetur sasi të tjera të drogës.
Punonjës të portit që kanë qenë dëshmitarë të aksionit të policisë në 5 ditët e fundit, thonë se kanë parë lëvizjet dhe kërkimet intensive. “Kanë sjellë edhe polumbarë. Po kot se ku rri malli në det se e hajnë peshqit”, thotë një punëtor i sektorit të mineraleve, teksa po e seleksionon kromin që po ngarkohet në një anije tjetër drejt Suedisë.
Punonjës të policisë i tha BIRN se përveç kontrollit të imtësishëm me qen për të zbuluar drogën midis ngarkesës me qymyr dhe në trupin e anijes, policia kontrolloi fundin e anijes për modifikime të mundshme apo për mundësinë e hedhjes së drogës në akuariumin e portit.
Droga e kapur në anijen me qymyr, përbën një risi edhe për policinë, e cila kryesisht ka kapur drogë të fshehur mes mallrave në kontejnerët që vijnë nga Amerika Latine. Rastet më të njohura janë episodet n ënjë kompani të importit të bananeve në kontenierët e të cilës u gjet kokainë në pesë episode të veçanta. Sasia në total e drogës ishte 48 kilogramë.
Sasia më e madhe e kokainës u kap në vitin 2018, kur u sekuestruan edhe 613 kg kokainë për trafikimin e të cilës u deklaruan fajtorë administratori i kompanisë “Arbi Garden” që kishte porositur ngarkesën e bananeve ku gjet droga./GSH
