Lideri i Nismës për Kosovën, Fatmir Limaj, ka përshëndetur lirimin e ish-gjeneralit të UÇK-së, kryetarit të Komunës së Skënderajt, Sami Lushtakut.
Përmes një postimi në Facebook, Limaj ka thënë se në historinë e Kosovës, lufta çlirimtare e UÇK-së është faqja më e ndritur e saj. Kjo luftë e pastër dhe patriotike e jona, sipas tij, u shënua me gjak dhe sakrifica të panumërta të popullit tonë.
“Bijtë dhe bijat më të vyer të popullit shqiptar të Kosovës dhanë lulen e rinisë për lirinë e pavarësinë e vendit. Ndërkohë figura të shquara të kësaj epopeje luftarako-patriotike, mbas lufte po përballën me akuza të pavërteta, një ndër ta është edhe Gjenerali, Sami Lushtaku, që po mbahej prej kohe në paraburgim me akuza të rrejshme. Lirimi i tij sot është një lajm shumë i mirë, dhe shpresojmë që drejtësia t’i japë fund sa më parë edhe procesit të bashkëluftëtarëve tanë të tjerë, që ende pa drejtësisht po ju merret liria”, përfundoi Limaj.
