Kryeministri i Kosovës dhe njëherit kryetari i LDK-së, Isa Mustafa ka vlerësuar se familja e madhe e Partive Popullore Evropiane (EPP), ka marrë një lajm pozitiv, pasi kancelarja Angela Merkel është rizgjedhur në krye të CDU-së dhe do të kandidojë për një mandat të katërt për kancelare të Gjermanisë.
Këtë vlerësim Mustafa e bëri në një postim në Facebook.
Postimi i plotë i Mustafës:
Familja e madhe e Partive Popullore Evropiane (EPP), ka marrë një lajm pozitiv. Kancelarja Angela Merkel është rizgjedhur në krye të CDU-së dhe do të kandidojë për një mandat të katërt për Kancelare të Gjermanisë.
Është lajm i mirë që në krye të CDU-së dhe të Gjermanisë, pas zgjedhjeve që do të mbahen vitin e ardhshëm, pritet të jetë sërish Kancelarja Merkel dhe CDU-ja, anëtare e Familjes së EPP-së, ku LDK-ja është anëtare shumë e respektuar.
CDU-ja dhe partitë tjera simotra në EPP, kanë dhënë përkrahje vendimtare për Kosovën në nënshkrimin e MSA-së dhe marrjen e rekomandimit për liberalizimin e vizave, përkrahje e cila do të jetë shumë e rëndësishme për ne, në të ardhmen.
Partitë e qendrës së djathtë në kuadër të EPP-së kanë dëshmuar lidership, zotësi për reforma, garanci për zhvillim dhe integrime gjithëpërfshirëse evropiane si dhe kapacitete për ballafaqim me sfidat bashkëkohore.
LDK-ja është përfaqësuesja më e denjë e këtyre vlerave në Republikën e Kosovës, duke fituar në këtë mënyrë besimin e plotë të anëtarëve të tjerë të EEP-së.
“Shtëpia nuk mbahet pa miq”, thoshte Presidenti Historik, Dr. Ibrahim Rugova.
