Dy foshnja, binjakë nga vetëm 40 ditë, janë therur në Shtërpcë, raporton KTV.
Njëra prej foshnjave ka vdekur, derisa tjetra është dërguar në qendrën klinike në Nish e binjakët i ka sulmuar për motive deri tash të paqarta babai i tyre.
Dejan Krsticic, 35-vjeçar, arsimtar i edukatës fizike në shkollën e mesme të Shtërpcës, dyshohet se theri me thikë binjakët djem, njoftoi Policia e Kosovës.
Policia menjëherë kishte dalë në vend të ngjarjes dhe arrestoi të dyshuarin, të cilit i është caktuar masa prej 48 orëve e paraburgimit.
Mjeti i ftohtë, me të cilën u krye vrasja dhe tentim-vrasja, është konfiskuar nga policia. Dragoljub Živanović, ndihmës i drejtorit për kirurgji të fëmijëve dhe ortopedi në Spitalin e Nishit, ka thënë se foshnja e cila u mbijetoi plagëve më të arritur në spital është operuar dhe gjendja e saj është stabile. Ai konfirmoi se fjala është për një djalosh 40 ditësh, i cili në spital erdhi me plagë në stomak e qafë. Foshnja e dytë, e cila nuk mbijetoi, ishte therur në pjesën e qafës, derisa vdiq në rrugën nga Shtërpca në Graqanicë.
Incidenti, sipas Dragan Ivankovic, komandant i policisë në Shtërpcë, ndodhi pasi Krsticic u grind me bashkëshorten.
