Një ngjarje e rëndë ka ndodhur në Tepelenë, ku një banesë është përfshirë nga zjarri dhe për pasojë kanë humbur jetën një grua 35 vjeçare dhe foshnja e saj 6 muajshe.
Sipas të dhënave paraprake të policisë, ngjarja ka ndodhur në lagjen “15 Shtatori”, në Tepelenë, ku në katin e parë të pallatit, ka rënë zjarr në banesën e shtetasit G.Sh.
Si pasojë e zjarrit kanë gjetur vdekjen gruaja e tij shtetasja E.Sh, 35 vjeçe si dhe djali 6 muajsh.
Në vendngjarje kanë shkuar shërbimet e policisë dhe shërbimi zjarrfikës, të cilët kanë bërë të mundur shuarjen e flakëve, si dhe nisjen e hetimit për zbardhjen e shkaqeve të rënies së zjarrit.